Press Release

An tAire Ní Ainifín i gceannas ar dhianfheachtas turasóireachta sna Stáit Aontaithe

d’fhonn níos mó daoine a mhealladh go hÉirinn

“Táthar ag díriú isteach ar na milliúin de Mheiriceánaigh a d’fhéadfaí a mhealladh chun na tíre seo i bhfeachtais fógraíochta agus dírmhargaíochta a bhí ag Tourism Ireland sa chéad leath den bhliain seo agus is í ár dteachtaireacht chucu nach raibh a leithéid de mhargadh le fáil riamh roimhe seo ar oileán na hÉireann agus nach raibh an fháilte níos croíúla riamh” arsa an tAire Turasóireachta, Cultúir agus Spóirt, Máire Ní Ainifín inniu.

Tá an tAire Ní Ainifín i Nua Eabhrac agus tús á chur le dianfheachtas chun na nithe is díol suntais in Éirinn ó thaobh na turasóireachta, an chultúir agus an spóirt de a chur chun cinn. Fad is a bheidh sí ar cuairt i Nua Eabhrac buailfidh an tAire le pearsana thábhachtacha an tionscail, bainfidh sí faoi leas as deiseanna spriocdhírithe ó na meáin agus seolfaidh sí Daonáireamh 1901 go foirmiúil ar líne i gcomhair léitheoirí Mheiriceá.

“Tá feachtas treisiúil ar bun ag Tourism Ireland i mbliana. Tá na teachtaireachtaí atá á dtabhairt ann faoi phraghsanna soiléir agus tarraingteach. Tabharfar cuireadh go hÉirinn do bhreis is 250 mórscríbhneoir Taistil agus Slí Mhaireachtála as Meiriceá i mbliana agus craolfaidh comhpháirtithe sna meáin amhail CBS, NBC agus PBS agus comhpháirtithe eile nach iad cláir faoi thogha agus rogha na hÉireann, cláir a bheidh le feiceáil ag na sluaite ar fud na tíre.

Ó tharla go mbeidh daonáireamh deiridh agus iomlán na hÉireann, ón mbliain 1901, á sheoladh ar líne spreagfaidh sé seo níos mó daoine le breathnú siar ar a stair agus a sinsir agus tá ionann is 40 milliún duine ina gcónaí sna Stáit Aontaithe a mhaíonn gur de shliocht Éireannach iad. Is iomaí duine a bheidh corraithe nuair a fheicfidh siad an tuairisceán féin, tuairisceán ar líon gaolta a bhfuil gaol díreach acu leo isteach é oíche an daonáirimh i mí Márta 1901. Is eol dúinn gur léiríodh an-spéis i ndaonáireamh 1911 ar fud na cruinne nuair a cuireadh amach ar líne é; céim eile a bheidh sa daonáireamh seo, atá níos sine fós, ag daoine atá ag iarraidh teacht ar eolas faoina sinsir.”

I dtús a cuairte ar Nua Eabhrac bhuail an tAire Ní Ainifín leis an aisteoir, Gabriel Byrne, an chéad duine le bheith ina Ambasadóir na hÉireann don Chultúr. Tá Byrne, atá ag déanamh scannáin i Nua Eabhrac faoi láthair, ag obair i gcomhar leis an Aire Ní Ainifín agus le Cultúr Éireann, thar ceann an Rialtais, ar mhaithe le healaíona, cultúr agus tionscail chruthaitheacha na hÉireann a chur chun cinn go hidirnáisiúnta. Dúirt an tAire gur labhair sí ina comhráite le Gabriel faoi phleanáil i gcomhair na dtionscnamh a bheidh ag tarlú go luath, lena n-áirítear Cultúr Éireann a bheith ag díriú go speisialta ar na Stáit Aontaithe sa bhliain 2011.

Tá leas á bhaint ag an Aire Ní Ainifín as a cuairt freisin chun an bholscaireacht ar ealaíona agus ar chultúr na hÉireann a bhrú chun cinn; sin mírcheann tábhachtach i Straitéis na hÉireann – na Stát Aontaithe a seoladh anuraidh. “Nuair a bhí an Fóram um Gheilleagar na hÉireann ar siúl in Farmleigh anuraidh b’fhacthas gur ghné lárnach ab ea an cultúr chun próifíl na hÉireann a ardú thar lear óna n-eascróidh buntáistí don turasóireacht, don trádáil agus don infheistíocht.”

Buailfidh an tAire Ní Ainifín le Christine Quinn, Ceannlabhartha Chomhairle Cathrach Nua Eabhrac Dé Máirt chun an chomhthacaíocht agus infheistíocht ó Chathair Nua Eabhrac agus Rialtas na hÉireann a phlé i dtaca le hIonad nua do na hEalaíona agus don Chultúr Éireannach a fhorbairt i Nua Eabhrac. Tabharfaidh an tAire cuairt freisin ar Ionad na nEalaíon Éireannach chun cruinniú faisnéise a bheith aici maidir lena bpleananna forbartha. Buailfidh sí freisin le hionadaithe ó Amharclann an Rince Ghaelaigh, ón gCumann Staire Meiriceánach-Éireannach agus ó Amharclann Origin chun deiseanna ar chomhoibriú a phlé.

Dúirt an tAire Ní Ainifín mar fhocal scoir “is eol dúinn gur mór an spéis le daoine cuairt a thabhairt ar Éirinn, agus gur tháinig ionann is 1 milliún duine as Meiriceá Thuaidh ar cuairt ar oileán na hÉireann anuraidh. Ní mór dúinn dua a chaitheamh anois le cur ina luí ar dhaoine na háirithintí a dhéanamh le go mbeidh saoire ar mhargadh maith agus ceann nach ligfidh siad i ndearmad go deo le caitheamh acu.”

CRÍOCH