Press Release

An tAire Ní Ainifín i dteannta ionadaithe thionscal na turasóireachta as áiteanna ar fud na cruinne ar mhaithe leis an ród roimh earnáil turasóireachta na hÉireann a bheartú

“Is cuid den phleanáil is gá a dhéanamh do na deich mbliana seo chugainn fís shoiléir a aithint don turasóireacht ar oileán na hÉireann, ina mbeadh cóimheá idir an uaillmhian agus an réalachas ach freisin ina leagfaí béim ar ár láidreachtaí” a dúirt an tAire Turasóireachta, Máire Ní Ainifín T.D., inniu. Bhí an tAire ag labhairt le 120 ionadaí nó mar sin as tionscal na turasóireachta a bhí i mBaile Átha Cliath inniu chun páirt a ghlacadh i gCruinniú Mullaigh ar an Nuálaíocht de chuid Tourism Ireland a bhí ar siúl i dTeach Farmleigh i mBaile Átha Cliath.

Bhí an méid seo a leanas le rá ag an Aire Ní Ainifín ina haitheasc le toscairí as an Ríocht Aontaithe, mórthír na hEorpa, Meiriceá Thuaidh, an Astráil agus le hoifigigh thionscal na turasóireachta, an chultúir agus an spóirt as Éirinn, thuaidh agus theas, “bhí sé i gceist leis an tuarascáil ó Ghrúpa Athnuachana na Turasóireachta a tháinig amach le déanaí an bealach chun cinn a bheartú, agus béim a leagan ar an ngá atá le hinfheistíocht leanúnach a dhéanamh sa bhranda Éireannach trí mhargaíocht éifeachtach, mar aon le hinfheistíocht athnuaite sa táirge turasóireachta – cóiríocht, bia, nithe is díol suntais agus seirbhísí tacaíochta. Féadfaidh infheistíocht den sórt cur le feidhmíocht iomaíoch na hÉireann.

Tá an branda Éireann ar cheann de na brandaí is láidre ar domhan agus is mór an méid a bhainimid amach d’oileán chomh beag linn agus is iontach an lán dea-mhéine atá amuigh ansin ach teacht i dtír uirthi. Ní mór dúinn leanúint orainn de bheith ag athnuachan an táirge a bhíonn ar tairiscint againn do thurasóirí ach gan na príomhnithe is díol suntais dá bhfuil againn a ligean i ndearmad ós gurb iad is mó a mheallann cuairteoirí chun Éire a roghnú mar phríomhcheann scríbe.”

Ní hé amháin gur maith ann í an obair a dhéanann Tourism Ireland don turasóireacht, is maith ann í don gheilleagar san iomlán arsa an tAire Ní Ainifín. “Cothaítear isteach is amach le 200,000 post anseo san earnáil turasóireachta. Tagann isteach is amach le €4 billiún de ranníocaíocht isteach sa dá gheilleagar atá ar an oileán as turasóireacht choigríche.

Feictear don Rialtas gur príomhfhoinse tuillimh easpórtála í an turasóireacht agus gur príomhfhoinse fostaíochta í ina mbaintear leas as raon scileanna ar fud an oileáin. Níl rud nach bhfaigheadh duine in Éirinn ó na suíomhanna oidhreachta domhanda, Sí an Bhrú, Cnóbha agus Dubhadh nó Sceilg Mhichíl go Fáilte chaoin Uí Cheallaigh a bhfuil a cáil orainn.

Tá an bonneagar nua, amhail bóithre agus mótarbhealaí nua mar aon le nithe móra eile is díol suntais amhail na staidiamaí spóirt, an Lárionad nuathógtha Tionóil i mBaile Átha Cliath maille leis na nithe is díol suntais ó thaobh an chultúir de ag cur leis an sásamh a fhaightear faoin mbranda Éireannach.

Ní mór dúinn cluas le héisteacht a thabhairt dár gcustaiméirí mar sin féin, maidir le luach a gcuid airgid a fháil agus le sásamh breá a bheith ag daoine, sásamh a spreagfaidh iad chun teacht ar cuairt chugainn arís amach anseo chomh maith le cuairteoirí a mhealladh ó mhargaí nua. Baineann a bhfuil á phlé anseo inniu ag an gcruinniú mullaigh seo agus a bheith ábalta an táirge atá ar tairiscint againn a scrúdú go criticiúil lenár bhfócas a athnuachan an tráth is suntasaí seo i stair an tionscail.”

CRÍOCH