Preaseisiúint Dé hAoine, 2^ra Bealtaine 2008

OS CIONN €10 MILLIÚN DE MHAOINIÚ Á FHÓGAIRT AG AN AIRE I GCOMHAIR 13 TIONSCADAL MHÓRA EALAÍON AGUS CULTÚIR I 12 CONTAE

NÍ MÓR DÓIBH SEO A FHAIGHEANN MAOINIÚ IARRACHT A DHÉANAMH LE GO MBEIDH TEACHT AG NÍOS MÓ DAOINE AR NA HEALAÍONA, AR AN GCULTÚR AGUS AR AN GCRUTHAITHEACHT – SÉAMAS Ó BRAONÁIN

D’fhógair an tAire Ealaíon, Spóirt agus Turasóireachta, Séamus Ó Braonáin T.D., inniu (Dé hAoine, 2^ra Bealtaine) os cionn €10 milliún de mhaoiniú do 13 tionscadal mhóra ealaíon agus cultúir i dhá chontae dhéag faoin mbabhta deiridh d’infheistíochtaí faoi ACCESS 11, An Scéim Tacaíochta Caipitil do na hEalaíona agus don Chultúr.

Dírítear an maoiniú faoin scéim ACCESS ar thionscadail infreastruchtúir d’ardchaighdeán a sholáthar do na healaíona agus don chultúr trína gcuirtear saoráidí a bhíonn feabhsaithe go mór ar fáil agus trína gcuirtear le deiseanna ar fud na tíre ionas go mbeidh teacht níos fearr ar imeachtaí agus ar thionscnaimh ealaíon, chultúir agus oidhreachta. Is é príomhfhócas na scéime díriú ar na saoráidí ealaíon agus cultúrtha atá ann cheana a athchóiriú agus feabhas a chur orthu agus tacú le tionscadail nua tógála i láithreacha straitéiseacha geografacha.

Cuireadh €32.5 milliún de mhaoiniú ar fáil i gcomhair 67 tionscadal ar fud na tíre sa chéad sciar den mhaoiniú faoi ACCESS II a fógraíodh in Aibreán 2007. Tugann an €10.29 milliún de leithdháileadh an lae inniu i gcomhair 13 tionscadal bhreise an maoiniú faoi scéim ACCESS II chun críche. Beidh 80 tionscadal ealaíon agus cultúir, san iomlán, tar éis maoiniú a fháil trí infheistíocht de bheagnach €43 milliún.

Áirítear an méid seo a leanas leis an maoiniú a fógraíodh inniu: €2 mhilliún d’Amharclann Garage i Muineachán, Ionad Ealaíon Sirius, An Cóbh, Co. Chorcaí (€1.6 milliún), Ionad Ealaíon Bhéal an Átha, Co. Mhaigh Eo (€1.2 milliún), Dánlann Ealaíne Chathair Luimnigh (€960,000), Ionad Cultúrtha Shéamus Ennis, An Aill, Co. Bhaile Átha Cliath (€740,000), Dánlann Ealaíne Bhaile Átha Luain, Co. na hIarmhí (€650,000), Dánlann Bhardasach Lantern, An Nás, Co. Chill Dara (€580,000) agus Artlink, Bun Cranncha, Co. Dhún na nGall (€570,000).

Bhí an méid seo le rá ag an Aire Ó Braonáin: “Tá aitheantas faighte go forleathan ag an scéim ACCESS mar scéim a mbíonn ionchur suntasach aici maidir le soláthar infreastruchtúir d’ardchaighdeán i gcomhair na n-ealaíon agus an chultúir thart timpeall na tíre. Is vóta láidir muiníne i dtábhacht na n-ealaíon agus an chultúir an infheistíocht seo de bheagnach €43 milliún d’airgead cáiníocóirí faoin scéim seo amháin chun feabhas a chur ar shaoráidí agus chun cur leo. Agus is mór atá sé d’fhiacha orthu siúd a bhfuil maoiniú á fháil acu é a bheith mar thosaíocht acu a ndícheall a dhéanamh chun slite nua samhlaíocha a aithint chun deiseanna ealaíon, cultúir agus cruthaitheacha a bheith ann do i bhfad Éireann níos mó dár ndaoine, beag beann ar aois, ar chúlra sóisialta ná ar náisiúntacht.

Déanfaidh mo Roinn beagnach €250 milliún d’airgead cáiníocóirí a infheistiú in earnálacha na n-ealaíon agus an chultúir i mbliana féin fiú amháin. Is mór an iontaoibh é seo as tábhacht na n-earnálacha seo ní hé amháin é ó thaobh fhorbairt agus stádas na hÉireann ach freisin ó thaobh an chion tairbhe atá á dhéanamh acu maidir le dul chun cinn eacnamaíoch agus sóisialta na tíre”.

Ba 155 líon iomlán na n-iarratas a fuarthas ar mhaoiniú faoi ACCESS II. Rinne Coiste Roghnaithe Neamhspleách na hiarratais go léir a mheas agus chuir sé moltaí faoi bhráid an Aire. Bhí liosta cúltaca san áireamh leo mar gur bhraith an Coiste gurbh fhiú tacaíocht a thabhairt dóibhsean atá ar an liosta dá mbeadh maoiniú sa bhreis ar fáil faoin bPlean Forbartha Náisiúnta. Is i gcomhair tionscadal atá ar an liosta cúltaca sin an €10.29 milliún de mhaoiniú sa bhreis a fógraíodh inniu.

Is iad seo a leanas na tionscadail ar faomhadh maoiniú dóibh faoin mbabhta deiridh seo d’ACCESS 11:

Deontais faoi ACCESS II	Leithdháileadh Deontais
Ionad Ealaíon Bhéal an Átha, Maigh Eo	€1,200,000
Amharclann Garage, Muineachán	€2,000,000
Ceardlann Mhacnais, Gaillimh	€470,000
Arthouse an tSráidbhaile, Laois	€440,000
Artlink, Dún na nGall	€570,000
Dánlann Ealaíne Bhaile Átha Luain, An Iarmhí	€650,000
Ionad Ealaíon & Cultúrtha Choill an Chollaigh, An Cabhán	€350,000
Graphic Studio, Baile Átha Cliath	€340,000
Dánlann Bhardasach Lantern, Cill Dara	€580,000
Dánlann Ealaíne Chathair Luimnigh	€960,000
Ionad Cultúrtha Shéamus Ennis, Baile Átha Cliath	€740,000
Ionad Ealaíon Sirius, An Cóbh, Corcaigh	€1,600,000
Ionad Ealaíon Soltice, An Mhí	€390,000
Iomlán	€10,290,000

TABHAIR FAOI DEARA – Tá na sonraí faoi gach tionscadal ar leith agus faoin úsáid a bheartaítear a bhaint as an maoiniú atá faofa ceangailte leis seo.

Tuilleadh eolais ó: Tom Rowley, Comhairleoir Preasa 087 8124723

Graphic Studio, Baile Átha Cliath - €340,000

Dánlann Graphic Studio i mBarra an Teampaill i mBaile Átha Cliath agus Ceardlann Graphic Studio atá suite de leataobh ó Ché Hanover atá sa Graphic Studio, Baile Átha Cliath. Is í Dánlann Graphic Studio an dánlann is sine i mBaile Átha Cliath ina bhfuil teacht ar phriontaí comhaimseartha úrnua. Tá maoiniú á chur ar fáil chun athfhorbairt a dhéanamh ar an Graphic Studio ionas go mbeidh saoráid ealaíne ann ina mbeidh áiseanna chun priontaí a dhéanamh mar a dhéantaí go traidisiúnta mar aon le háiseanna chun iad a dhéanamh ar mhodhanna níos nuaí agus ionas go gcuirfear leis an méid atá inti faoi láthair agus go mbeidh teacht níos fearr uirthi.

Dánlann Lantern, Cill Dara - €580,000

Tá meascán eicléictiúil de phéintéireachtaí, de phriontaí agus de dhealbha sa bhailiúchán bardasach ealaíne atá ag Comhairle Contae Chill Dara. Tá saothair le roinnt de na hamharcealaíontóirí is iomráití in Éirinn agus le daoine nach iad sa bhailiúchán. Áirítear na healaíontóirí seo a leanas orthusan: Evie Hone, Patrick Pye, Patrick Collins, Charlie Brady, Sean Mc Sweeney, Robert Ballagh, Norah Mc Guinness. Tá an maoiniú á chur ar fáil i gcomhair ionaid do Dhánlann Bhardasach Lantern, ionad nua chun an bailiúchán bardasach atá ar champas Áras Chill Dara, Oifigí Cathartha Chomhairle Contae Chill Dara a choinneáil ann. Úsáidfear spás taispeántais na n-ealaíon chun an bailiúchán reatha den Ealaín Bhardasach a bheith le feiceáil, a chur chun cinn agus a chur ar taispeáint chomh maith le saothair mhínealaíne, suiteálacha ealaíne comhaimseartha agus taispeántais ilmheán.

Dánlann Ealaíne Chathair Luimnigh - €960,000

Bíonn réimse leathan de shaothair ealaíne agus de thionscadail le healaíontóirí áitiúla, náisiúnta agus idirnáisiúnta ar taispeáint i gclár comhaimseartha Dhánlann Ealaíne Chathair Luimnigh. Tá saothair atá déanta i meáin éagsúla lena n-áirítear péintéireacht, dealbhóireacht, tarraingt, grianghrafadóireacht, suiteáil agus meáin nua ar chlár an taispeántais. Tá Bailiúchán Buan breá de shaothair le healaíontóirí Éireannacha ó luath san ochtú haois déag, naoú haois déag, fichiú agus aonú haois is fiche i nDánlann Ealaíne Chathair Luimnigh. Tá an maoiniú á chur ar fáil chun Dánlann Chathair Luimnigh a fhorbairt ionas go mbeidh spás ann do bhailiúchán, ceardlann, caifé, leabharlann, spás léitheoireachta agus ionas go bhféadfar an spás riaracháin a uasghrádú agus go ndéanfar athchóiriú agus athnuachan ar na spásanna tógála agus dánlainne atá ann faoi láthair.

Ionad Cultúrtha Shéamus Ennis, Baile Átha Cliath - €740,000

Tá Ionad Cultúrtha Shéamus Ennis suite san Aill, Fine Gall, Co. Bhaile Átha Cliath. Is i gcuimhne an Éireannaigh, Séamus Ennis, ceoltóir agus bailitheoir seanchais agus ceoil atá an t-ionad ann agus bíonn roinnt den chuid is fearr de cheoltóirí, de chumadóirí amhrán agus d’ealaíontóirí an lae inniu ina n-aíonna ann. Tá maoiniú á chur ar fáil chun ionad nua taibhithe a thógáil mar aon leis na háiseanna coimhdeacha do sheomraí cleachtaidh agus ranga. Samhlaítear go gcuirfidh an spás nua seo go mór le méid an ionaid agus go mbeifear ábalta léirithe mór le rá a chur ar siúl istigh san ionad.

Ionad Ealaíon Sirius, An Cóbh, Corcaigh - €1,600,000

Ionad ildisciplíneach neamhbhrabúis do na healaíona i gceantar Iarthar Chorcaí is ea Ionad Ealaíon Sirius . Bunaíodh é sa bhliain 1988 agus tá sé d’aidhm leis feasacht a mhúscailt faoi na healaíona agus deiseanna a chur ar fáil chun páirt a ghlacadh sna healaíona agus taitneamh a bhaint astu. Cuirtear seo i gcrích trí mheascán d’imeachtaí lena n-áirítear na hamharcealaíona, clár cáiliúil na n-ealaíontóirí cónaithe, ceol, clár na n-ealaíon pobail agus clár litríochta. Tá maoiniú á chur ar fáil chun athfhorbairt a dhéanamh ar Ionad Ealaíon Sirius agus áireofar leis sin an tsaoráid atá ann faoi láthair a athdhearadh chun áiseanna breise a chur isteach inti agus ionas go mbeidh níos mó spáis inti do dhaoine as an bpobal nuair a bheidh siad ar cuairt.

Ionad Ealaíon Solstice, An Mhí - €390,000

Osclaíodh Ionad Ealaíon Solstice, atá suite ar Shráid an Iarnróid san Uaimh, sa bhliain 2006 agus tá spás amharclainne ann ina bhfuil áit suite do 320 duine agus tá spásanna coimhdeacha dánlainne ann chomh maith. Is iomaí ceann de na healaíona a bhíonn á léiriú nó ar taispeáint san ionad lena n-áirítear drámaí le grúpaí ar camchuairt agus le grúpaí áitiúla, ceol traidisiúnta agus comhaimseartha, ceoldrámaíocht, bailé, na hamharcealaíona agus roinnt mhaith eile. Tá maoiniú á chur ar fáil chun síneadh a thógáil le cur le hIonad Ealaíon Solstice agus lena fheistiú i gcomhair gníomhaíochtaí ilchuspóireacha lena n-áirítear damhsa agus cleachtadh. Beidh an spás seo ar fáil do ghrúpaí gairmiúla, do ghrúpaí amaitéaracha as an áit agus d’ealaíontóirí agus do chompántais as Éirinn agus as tíortha ar fud an domhain a bheidh ar cuairt.

Ionad Ealaíon & Cultúrtha Choill an Chollaigh, An Cabhán - €350,000

Áirítear léachtaí, ceardlanna, ranganna damhsa, léirithe, taispeántas scannán agus cúrsaí oiliúna do mhúinteoirí ar an raon imeachtaí a bhíonn ar siúl in Ionad Ealaíon & Cultúrtha Choill an Chollaigh agus dá bhrí sin is ionad é ina gcuimsítear na healaíona, an oidhreacht agus an cultúr. Tá clár imeachta á chur i bhfeidhm ann ó cheann ceann na bliana ó Dheireadh Fómhair 2002 i leith. Tá maoiniú á chur ar fáil d’Ionad Ealaíon & Cultúrtha Choill an Chollaigh chun athchóiriú a dhéanamh ar an seanteach cóiste ionas gur féidir é a fheistiú le go mbeidh stiúideonna d’ealaíontóirí, spás i gcomhair imeachtaí, cistin, leithreas agus áiseanna feistis ann.

Arthouse, An Sráidbhaile, Co. Laoise - €440,000

Tá maoiniú á chur ar fáil d’Arthouse, An Sráidbhaile, Co. Laoise chun athchóiriú a dhéanamh ar an seanteach cúirte agus é a fheistiú mar ionad nua ealaíon. Áireofar stiúideo taifeadta, dánlann, caife agus gairdín dealbhóireachta leis na háiseanna a bheidh ann. B’fhónta an ní é an seanteach cúirte a bheith in úsáid mar ionad ealaíon mar gur foirgneamh stairiúil é agus bheadh beocht san áit an athuair leis an bhforbairt.

Ionad Ealaíon Bhéal an Átha - €1,200,000

Ba é Ionad Ealaíon Bhéal an Átha áit na n-ealaíon i mbaile Bhéal an Átha ón mbliain 1994 i leith agus is ansin, go príomha, a eagraítear na himeachtaí ealaíon a bhíonn ar siúl sa bhaile. Baineann leanaí, daoine fásta, daoine faoi mhíchumas, ealaíontóirí agus daoine nach ealaíontóirí iad tairbhe as na cláir ar ardchaighdeán a bhíonn ar bun ann. Bainfear leas as an deontas i gcabhair atá le cur ar fáil ag an Roinn chun an tIonad Ealaíon atá ann a fheabhsú chun go mbeidh amharclann nua ann ina mbeidh áit suite do 250 duine agus chun an cheardlann agus an spás taispeántais a fheabhsú. Freastalaítear ar 1,800 duine faoi láthair faoin gclár Ceardlainne agus For-rochtana agus ba chóir gur 2,500 duine an líon daoine a mbeifí ábalta freastal orthu trí bhíthin an mhaoinithe a sholáthróidh an Roinn Ealaíon, Spóirt agus Turasóireachta.

Amharclann Garage, Muineachán - €2,000,000

Baineann grúpaí amharclainne a bhíonn ar camchuairt agus a mbíonn léirithe amharclainne gairmiúla d’ardchaighdeán acu úsáid as an ionad seo. Baineann grúpaí amaitéaracha as an áit úsáid as an spás chomh maith agus acmhainn don phobal áitiúil is ea é. Is istigh i mbarda nach mbíonn in úsáid in Ospidéal Síciatrach N. Damhnait, Bóthar Ard Mhacha, Co. Mhuineacháin atá an amharclann. Osclaíodh í sa bhliain 1992 agus ba iad an Coiste Gairmoideachais, Compántas Drámaíochta Mhuineacháin agus An Chomhairle Ealaíon a mhaoinigh í i dtús ama. Bainfear leas as an maoiniú atá le cur ar fáil ag an Roinn chun amharclann atá le tógáil d’aon toisc agus áiseanna coimhdeacha a bheith i lár bhaile Mhuineacháin i leaba an ionaid atá ann.

Ceardlann Mhacnais Gaillimh - €470,000

Bunaíodh Macnas i nGaillimh sa bhliain 1986. Tá cáil bainte amach ag Macnas ó shin mar cheann de na compántais is fuinniúla agus is díol suntais sna hEalaíona in Éirinn. Baineann an tsamhlaíocht, an paisean, an greann agus an féinmhuinín agus iad fuinte ina chéile leis na cúlraí éagsúla ina n-oibríonn Macnas: in amharclanna, ar shráideanna, i scoileanna agus i bpobail.. Bainfear leas as an €470,000 atá le tabhairt faoi Scéim ACCESS II chun áit shaincheaptha a thógáil ina mbeidh ceardlann suíomh scéil, ceardlann déanta frapaí, stiúideo cleachtaidh agus ceardlann déanta feistis. Beidh seomra oiliúna agus áiseanna riaracháin ag Macnas dá bharr. Is é atá d’aidhm leis ionad nua-aimseartha ealaíon a sholáthar ina dtabharfaí tacaíocht do Mhacnas agus dá chuid léirithe.

Artlink, Dún na nGall - €570,000

Is é atá d’aidhm le tionscadal Dhánlann agus Stiúideo Artlink EXPOSURE cur le rannpháirtíocht an phobail sna healaíona agus tacú le healaíontóirí. Bainfear leas as an €570,000 chun ionad faoi leith a bhunú ina mbeidh áit chónaitheachta agus stiúideonna d’Ealaíontóirí agus freisin ina mbeidh bunáit riaracháin, Ceardlann Rannpháirtíochta agus spás Taispeántais. Bhainfí leas as an stiúideo mar bhunáit i gcomhair imeachtaí malartaithe cultúrtha agus foghlama idir chomhpháirtithe áitiúla, trasteorann agus idirnáisiúnta.

Dánlann Ealaíne Bhaile Átha Luain - €650,000

Is é atá d’aidhm leis an tionscadal dánlann chomhaimseartha agus stiúideonna a fhorbairt go speisialta d’ealaíontóirí i mBaile Átha Luain. Beidh an dánlann suite ar shuíomh breá suntasach cois abhann i gcroílár Bhaile Átha Luain. Beidh bailiúchán buan inti a fhorbrófar, a bheidh á choimeád agus á chaomhnú mar aon le sraitheanna de thaispeántais shealadacha ar ardchaighdeán ar an-díol suntais a bheidh iontu do mhuintir na hIarmhí. Tiocfaidh cuimsiú sóisialta faoi ghné an oideachais agus na for-rochtana agus cuirfear teacht a bheith ag cách ar na healaíona chun cinn fúithi chomh maith.